История

Лöзым сикт медводдзаысь казьтылöма писцöвöй небöгын 1586-öд воын: «деревня Лозома, что был погост Лозома». Грезд дорын меститчöма Зыков пöчинöк.

Ним артмöмыс абу тöдса. Вермас лоны, мый «лус» кывйысь, мый лоö «нюръя видз», «туруна неыджыд нюръя ты» либö лусым – важ ю сёртас. Сикт дорын важся тылöн меститчöмыс тöдчöдö тайöс.

Мöд ног нимсö шуöны: туйыс водзын мунöма Сыктыв ю пöлöн, и керöсыс тыдавлöма быттьö тшын пиын (сыöн и «лöз», тадз и шуöны овмöдчöминсö - «Лöзым»).

1608 воын вöлöма 3 олан да 3 овтöм керка, казьтывсьö сöмын öти ним – Чиул. 1646 воын грездын «что был погост Лозомана» Зыков пöчинöкын да выль грезд Спиридоноскöйын вöлöма 6 олан да 2 овтöм йöр, олысьяслöн влöма Шелай, Черепахин, Конев, Патев овъяс.

Некымынöн 30-40 воясö вуджлöмаöсь овны Сибирö. 1678 воын 3 грездыс öтувтчöмаöст Лöзымö, кöнi вöлöма 7 олан и 1 овтöм йöр, 20 олысь. Олысьяслöн Симаков, Максимов, Туробов, Минин овъяс. 1784 во кежлö Лозымскöй грездын 25 йöрöдз, 143 олысь; 1859 воын Лозымская либö Лöзым грездын 60 йöрöдз, 481 олысь. 1891 воын воссьöма грамота школа, 1901 воын – начальнöй училище, 1903 воын – библиотека. 1926 воын Лозымское погостын лыддьысьö 53 йöр, 191 олысь. Скитын медводдза стрöйбаяс артмисны Лэбин Ключ дорын öнiя Вылигрездсянь 400 метра ылнаын. Водзö овмöдчисны Вылигрездын, Гыбадын, Погостын, Сотчöмвылын, Вöръяшорын, а сэсся и Артипгрездын.

1960-öд воясын сикт официальнöй öтувтлiсны грездъяскöд öти овöдчöминö. 1970 воын танi олöны 506 олысь, 1989 воын – 438. 2011 вося январь 1 лун кежлö олысьыс 465.

1929-1939 сьöкыд воясö сиктын артмисны куим колхоз: Гыбад грездын «Лозунг», Погост грездын «Урожай», Шорсай грездын «Куйбышев». 1930 воын вöлi кыпöдöма молочно-товарнöй ферма (МТФ). 1950 вося август 26 лунö колхозъясысь вöлi котыртöма Молотов нима колхоз, мый 1956 воын нимтiсны «Звезда» колхозöн. 1957 воын «Сыктывкарский» совхоз лöсьöдöмöн колхоз пырис сэтчö Лöзымса юкöнöн, а 1966 воын вуджис вылысь артмöм «Пажгинский» совхозö.

Лöзымса юкöнын вöлi ас гараж, кöнi уджалiс 20 тракторöдз, уна вося турунъяслысь кöйдыс босьтан комбайн. Гыбад грездын вöлi порсь видзанiн, бöрас кыпöдiсны и кукань да мöс видзанiнъяс.

1977 восянь уджалö Лöзымса йöв комплекс, кöнi видзисны 1000 унджык мöс. 1999 воын сы пыдди артмисны «Югöр» видз-му овмöс кооператив да «Сысола» видз-му овмöс «Артель». Бöръяыс 2000 воын дугдiс уджавны.

na_sait.jpg

Yandex.Metrica
Проект «Села коми», 2013-2018 год. Все права защищены. При полном или частичном использовании материалов гиперссылка на selakomi.ru обязательна. При заимствовании фотографий или иллюстраций, необходимо тоже указать имя и фамилию ее автора.
Создание сайта — «Цифровой Век»

Сайт сделан в рамках проекта "Виртуальная республика"

Сикт йылысь

Документъяс

Выльторьяс

Приемнöй